الرئيسية
SMILE 4 LIFE
التسجيل
دخول
خرج ابن آدم من العدم قلت : ياه | |
رجع ابن آدم للعدم قلت : ياه | |
تراب بيحيا ... وحي بيصير تراب | |
الأصل هو الموت و الا الحياه ؟ | |
عجبي !!! |
ضريح رخام فيه السعيد اندفن | |
و حفره فيها الشريد من غير كفن | |
مريت عليهم .. قلت يا للعجب | |
لاتنين ريحتهم لها نفس العفن | |
عجبي !!! |
ياما صادفت صحاب و ما صاحبتهمش | |
و كاسات خمور و شراب و ما شربتهمش | |
أندم علي الفرص اللي انا سبتهم | |
و الا علي الفرص اللي ما سبتهمش | |
عجبي !! |
انا كل يوم أسمع ........ فلان عذبوه | |
أسرح في بغداد و الجزاير واتوه | |
ما أعجبش م اللي يطيق بجسمه العذاب | |
و اعجب من اللي يطيق يعذب أخوه | |
عجبي !!! |
قلبي عليل يا ناس و في الكاس دواه | |
مديت له إيدي شربت م اللي حــــواه | |
جنبي الشمال خف .. اليمين اتــــوجع | |
و إيه يداوي الكبد م اللي كـــــــــــواه | |
عجبي!! |
أيوب رماه البين بكل العـــــــــلل | |
سبع سنين مرضان وعنده شلل | |
الصــــبر طيب .. صبر أيوب شفاه | |
بس الأكـــــــــاده مات بفعل الملل | |
عجبي !!! |
ياللي عرفت الحب يوم و انطــــــــــــوي | |
حسك تقال مشتاق لنبع الهـــــــــــــــوي | |
حسك تقول مشتاق لنبع الغــــــــــــــــرام | |
ده الحب .. مين داق منه قطره...ارتوي | |
عجبي !!! |
يا ميت ندامه ع القلوب الخـــــــــــلا | |
لا محبة فيها و لا كراهـــــــــــه ولا | |
حتي يا قلبي الحزن ما عادش فيـــــك | |
معلهش .. لك يوم برضه راح تتملا | |
عجبي !! |
أوصيك يابني بالقمر و الزهـــــــــــــور | |
أوصيك بليل القاهرة المسحـــــــــــــور | |
و إن جيت في بالك .. إشتري عقد فل | |
لأي سمرا.. وقبري إوعك تـــــــــزور | |
عجبي !!!! |
يا عندليب ما تخافش من غنوتك | |
قول شكوتك و احكي علي بلوتك | |
الغنوه مش ح تموتك إنمــــــــــا | |
كتم الغنا هو اللي ح يموتــــــــك | |
يا ملونين البيض في شم النسيـــــم | |
لون الحنين و الشوق و خمر النديم | |
ما تعرفوش سايق عليكو النبــــــي | |
تلونوا الأيام بلون النعيــــــــــــــم ؟ | |
عجبي!! |
أنا كان لي أب . و كان رئيس محكـــمه | |
ستين سنة .. في قضية واحدة أترمي | |
ستين سنة و طلع براءة و خــــــــرج | |
يشكي الحياة و الموت لرب السمـــــا | |
عجبي !!!! |
