هل نعمل الخير؟ ولا بلاش

فى حياتنا بنسمع عن جرائم كتير بيعتمدوا منفذيها على حسن النيه لدى الضحيه واقدامها على فعل الخير
يعنى مثلا عندنا حصل مرة ان أسقطت سيده مخده من البلكونة فى الشارع وعندما مرة فتاة طلبت منها ان تضع المخده فى بير السلم عشان تنزل هيا تاخدها
وبحسن نيه ودى حاجه احنا بنعملها كتير
أخذت البنت المخده من على الارض ودخلت تحط المخده فى بير السلم
لاكن متعرفش انه كان منتظرها اتنين متفقين مع السيده
خطفوا الفتاه وباعوا اعضائها طبعا بعد قتلها
ومن بعد هذة الحادثه
تفتكروا المفروض نعمل ايه نبطل نعمل الخير ولا اية؟؟
انا حتى حصل معايا موقف بسيط جدا
كنت راجعه من الكليه ورايحه اوقف تاكسى عشان اروح لقيت سيده فى الاربعينات واقفه بقاها كتير مستنيه الميكروبص
وعرفت منها انها رايحه نفس المكان الى انا رايحاه
فقلتلها تركب معايا التاكسى وتروح معايا فقالتلى انها لاتملك أجره التاكسى
فركبتها معايا ودفعت لها جرتها
المشكله لما روحت لماما وانا فرحانه انى عملت خير فى ست كبيره
ماما زعلت جدا وقعدت تفترضلى 100 افتراض يفيد ان الست دى نصابه او كان من الممكن انها تخطفك وبصراحه كلها افتراضات قابله للتحقيق
وفى الاخر قالتلى معدتيش تعملى كده تانى
تفتكروا المفروض معدناش نعمل كده تانى؟؟؟؟؟؟

اولا الموضوع ده مهم جدااااا ومنتشر جداااا
ثانيا والدتك عندها حق والله وخايفه عليكى انت كنتى ساعديها واديها الفلوس بس متركبيش معها
المفروض نعمل الخير ونخاف ايضا على انفسنا فى ظل الظروف الغريبه والاحداث الغريبه الى بنشوفها

شكرا يا نسمه على رأيك
لاكن لو انتى ماشية وطلب حد منك انك تدخليله حاجه وقعت منه هل هتمشى ومتعبرهوش؟
ولا بحسن نيه هتدخلى الحاجه دى؟؟؟

و الله يا عيوشة انا بشكرك جدا عالموضوع ده بجد لانه موضوع مهم جدا و بنتعرضله يوميا ................

بجد أنا من رأيي بكل صدق اننا -- للأسف -- نبطل نعمل كدة لأن محدش يضمن الشخص ده عامل ازاي و لا نيته ايه و لا هيعملنا ايه ................. مش انا راجل أهه -- و وحش الوحوش هههههههههههههههههههه -- لكن بحاول اخد حذري جدا لأن بجد محدش بقة يتأمنله .....

يا بنتي و الله ما تستغربيش من رأيي ...... الواحد من اللي بيشوفه و بيسمعه مابقاش يأمن لأي حد ................ لأ و المصيبة السودا انها -- أحيانا -- بتيجي من الأصدقاء و اللي كلنا معاهم عيش و مله ............... و أقرب مثل على كدة " ريا و سكينة " اللي منكو شاف المسلسل " العجيب ده " يلاقي ان كل ضحاياهم كانو يعرفوهم و كانو عشرة عمر ............. و على فكرة انا بضرب مثل كلنا شوفنا و منتشر على فكرة ............. فما بالكو بالغريب ........



كتير قوي نسمع عن جرايم الشحاتين و الغلابة طبعا بنلاقيه " مقطع هدومه " و " قاطع رجله " و " فاقع عينه " و " معور وشه " و كل البلاوي دي و يقولك " لله " فطبعا بيصعب عالواحد و بنديله اللي فيه النصيب و لكن ولاد اللذينة بيستخدمو مواد و حاجات و محترفين قوي بربط رجليهم ... المهم لحد ما يلاقو كدة " ضحية محترمة " و طبعا بيكون متفق مع ناس " بيحومو حوالين المكان " بيمسكو الضحية .................. شوفتو أد ايه صعب علينا .... و طبعا شبيهة لها برضو الشحاتين اللي بيطلعو الشقق .... دا دول مصيبة سودا بيكونو اصلا مربطين عالضحية و دارسين احوالها كويس يعني من الاخر بيكونو جايين " بدسيسة " ..........

يا جماعة الموضوع بدأ بحسن نية من طرف و لكنه انتهى بسوء نية من الطرف الاخر ................


دا ايه الرغي ده ؟؟؟؟ معلش بقة طولت عليكو ,,,,,,,,,,,,,,,,,, شكرا عيوشة و كل اللي رد عالموضوع و يا رب يكون رايي عجبكو و اقنعكو

السلام عليكم
الموضوع ده شاغل الناس من فترة مش صغيرة
بس نفسي اعرف ايه سر اهتمام الناس بالحالات الفردية دي
اللي بيعملوا الخير كتييييييييييييييييييييير واللي بيقدروه اكتر
والدليل ان المدام اللي انتي وصلتيها لم تضرك بالعكس ده ممكن تلاقيها دعتلك
هو صحيح لابد من اتخاذ الحيطة والحذر بس لازم ما نقطعش عمل الخير
الخير ده هو سبب بقاء الحياة الكريمة
وفي راييي لازم قبل ما الخير يتعمل لازم يتدرس كل جوانبه


بس اقولك انا برضه مش موافق علي انك ركبتي المدام دي معاكي ( ذي مامتك )
بس لازم نفضل نعمل خير ( في حدود المعقول )
ارجو ان اكون جانبني الصواب

بس يا جنرال برضو محدش بجد بقة يتأمنله و بجد الناس الوحشة بقت اكتر من الحلوة بكتير قوي

حلوة منك يا جنرال حتة " اننا ندرس الموقف بكل جوانبه " ............. هوة احنا يا باشا هنعد نفكر و ندرس نعمل الخير و لا لأ .؟؟ ............... دي هتكون خربت مالطة .............. طبعا انا مش بدعو خالص اننا نهجر الخير ... بالعكس !! الخير له اشكال متعددة ممكن نعمله .................. انتا ممكن تتبرع لبناء مسجد او مستشفى ............ مستشفى 57357 بتاعت سرطان الطفال محتاجة لكل جنيه ............... انتا ممكن و انتا في ميكروباص تقوم لأي بنت أو واحدة ست كبيرة او راجل كبير ................. لكن في حاجات تانية لازم نحطاط كويس جدا

و شكرا جنرال على ردك

بص يا دوك
هو لازم ذي ما فيه الحلو فيه الوحش
وليه نبص علي نص الكباية الفاضي لا ياريت نبص للنص المليااااااااااااااااااااااان
صدقني هتبقي الحياة احلي بكتير

طب ومين اللي خلي تفكير الناس وحش
لازم نبدا نغير الفكرة دي

وشكرا علي اهتمامك برايي

علي فكرة التفكير ده لو الواحد واخد عليه بصورة مستمرة مش هياخد منك وقت

وكمان بص طبعا انت عارف الكوارث اللي بتحصل بسبب التاكسي سواء للبنات او للاولاد
طب ليه لسه بنستعمله
اكيد انت فهمت رايي

وهو الدنيا من امتي بتخرب لما الواحد بيفكر

صدقني ده اللي جايبنا وراااااااااااااااااااااااااااااااااااااااااا

شكرا جنرال على اهتمامك

الصراحه ياجماعه انا ياعيوشه لو حد طلب منى حاجه الصراحه بعملها على طول لانى طبعى حسن النيه الصراحه بس انا حصل موقف مع زميلتى انها وهى ماشيه وقفها رجل لابس على السنه وليه لحيه كبيره وماسك سبحه وراكب عربيه
فوقفها وطلب منها انها تؤدى له خدمه لانه عايز يتبرع بمبلغ ولازم يختم اوراق فى الالملجاء لكن ممنوع دخوله لانه كله بنات واترجها فهى لانه راجل كبير السن صدقته وركبت مععاه الاول قلها معلشى اركبى وراه علشان حرام هى قلتله طبعا اكيد وهى بتقلى يابنتى ده راجل كويس جدا ده مبصليش خالص المهمجيه عند مكان وقلها خدى الظرف ده دخليه وهى خارجه من العربيه قلها يابنتى سيبى شنطتك وحاجتك علشا متتلخميش وسمعت كلامه طبعا المهم يادوب هى نزلت وهو خد العربيه وجرى على طول
والله الواحد بقى محتار جدااااااااااااااااااااا
وانا عن نفسى مبقدرش اشوف اى حاجه اعملها ومبعملهاش الصراحه وبسبها على الله

هية دي المأساه يا جماعة ..........

بجد الناس اللي بيعملو كدة انا بسميهم " السوءنية " بدلا من " السنية " ههههههههههههههههههههههههههه

يبقا كدة يخلو من الدين ستار على جرائمهم ؟؟؟؟؟؟؟؟؟؟؟؟؟ بجد شئ محزن

قال و بنعيب عالغرب اللي بيهاجمونا ماهو من افعال الناس الزبالة دول

والله فعلا كتير حاليا يقوا بيتخوا وراء نقاب ووراء لحيه ويعملوا الى على مزجهم تحت شعار الدين على اساس ان مفيش حد هيشك فيهم
حسبنا الله ونعمه الوكيل

انا بشكركم كلكم انكم اهتميتم بالموضوع
اما رأى
بالنسبه لصاحبتك يانسمه فاعتقد انها جانبها الصواب فى الى هياعملته اصل متوصلش لدرجه انى اركب مع شخص معرفهوضش عربيته الخاصة!!!!!!
وانا معترفه انى مكنش مفروض اركبها معايا فى التاكسى بس انا مفكرتش ساعتها فى الفروض السيئه وعملتها بحسن نيه
اما ياشمساوى لو بطلنا نعمل خير مباشر واكتفينا بالتبرعات الدنيا هتبوظ ونرجع نقول ده الدنيا مافهاش خير!!!
وانت نفسك لما تتحط فى موقف محتاج فيه مساعده حد ومحدش يعبرك هتعد تقول كده
اما ياجنرال ان احنا نعمل الخير بحيطه فأنا معاك فيها بس حيطه لدرجه ايه؟
يعنى حتى فكره انى ادلها الفلوس تركب لوحدها فهى قد تكون نصابه ومش محتاجه يعنى برضو محققتش هدفى!!
ولو وثقت فى الى حوليا فانا اعرف واحده قتلت صاحبتها وتوام روحها عشان كانت محتاجه فلوس واهلها ضغطوا
اما بالنسبه للكبايه فبلاش نعذبها معانا أكتر من كده
مستنيه باقى الاراء