الوصايا العشره لاى فتاه مخطوبه او ناويه تتخطب والشباب برده

الوصايا العشر لكل فتاة مخطوبة
--------------------------------------------------------------------------------

أنستي العزيزة.. لو ربنا فك عقدتك.. واتخطبتي.. فإليك نصائحي حتى تأخذي بخطيبك من مركب الخطوبة إلِّلي محدش عارف هترسى على إيه.. إلى مثوااااه الأخير في قفص النسانيس.. قصدي قفص الزوجية السعيد..
أجمل ما في الخطوبة العزومات الرومانسية.. على أحلى محلات أكل فى البلد.. واللي عمرك مانتي شايفاها بعد الجواز.. المهم نصائحي لك عند أي عزومة مع خطيبك.. قلنا رقَّه ....
1- الأول لازم تعرفي إن الشوكة والسكينة بيتمسكوا من إيديهم من الطرف .. يعني مش م الوسط ولا م البوز زي الخنجر ولا من فوق طبعًااا
2- العيش أوعي تفضحينا وتقطعيه بسنانك.. ولا الرغيف نصين بأيدك وكل نص لقمة وتحشري.. أوعي.. العيش بيتقطع بالسكينة ف الطبق.. وبعدين تاخدي لقمة.. لقمة.. بالعافية.. قال يعني نفسك مسدودة.. اضغطي على أعصابك جدااا وبعدين لما تروَّحي.. إبقي حِفِّي زي مانتِ عايزه....
3- الشوووربة.. أبوس رجلك.. بند الشوربة ده مهم جدًاااا.. الشوربة تتشرب من غير صوت خالص.. ومن غير ماتقعدي تنفخي فيها.. زي القهوجي اللي بينفخ فى الحجر للزبون.. وطبعًاااااا عايزك تنسى تمامًا.. السلطانية اللي بتقيميها على بقك ف البيت.. وتدلدقي على روحك.. بالمعلقه وبدون صوت.. سخنة ولعة برضه بدون صوت.. وتسيبي تلت الطبق ع الأقل.. مش تميليه.. عشان تلهطيها لآخر نقطة.....
4- الرز طبعاً .. بيتاكل بالشوكة.. أوعي إيدك تتمد ع المعلقة.. وتغرفي من طبق الرز وتعبي.. إوعي.. الرز بالشوكة.. وكأنك بتبوسيه مش بتاكليه..
5- المكرونة.. الاسباجتي.. برضه بالشوكة.. تتلف على طرف الشوكة.. لحد ما تخلص وبعدين تحطيها ف بؤك من سكات.. مش تشفطي المكرونة عود عود..
6- السمك.. مشكلة.. شوفي.. بتفصلي اللحم عن الشوك.. إزاي..؟؟ تقطعي اللحم من النص.. بالطول وبعدين تفردي اللحم ع الجانبين ولما تخلصي ناحية.. متقلبيش السمكة.. بلاش فلح.. شيلي السلسلة بالشوكة والسكينة وحطيها ف جنب الطبق وكملي أكل النص التاني.. وبدل الفيلم الهندي ده.. نصيحة.. ماتكليش السمك خالص.. قولي مابحبش السمك
وخلصي نفسك..
7- الجمبري.. -إذا كنتي عارفاه-.. أول ماطبق الجمبري ينزل.. بصيله بقرف واحتقار شديدين.. آل يعني زهقانة من كتر أكل الجمبري الجامبو ف بيت ببااااا.. وأتنهدي جامد وقولي..
برضه..؟؟؟ وتروحي قاطعة راس الجمبريياية.. بالشوكة.. أنا ف عرضك إنسي المصمصة دلوقت..
8- البطاطس سواء مسلوقة أو محمرة.. أوعي تهرسيها وتدبيها ع الرز وتدي ...لا..لآ...لآ...بالشوكة حتة حتة وإنت زي ما تكوني هاتعيطي من كتر ما البطاطس صعبانة عليكي..
9- الفاكهة.. لو الفاكهة فيها بذر.. طلعيه من بؤك بالراحة وحطيه ف إيدك وهي مقفولة.. وبعدين ف طفاية السجاير اللي ع الترابيزه.. أوعي ياحبيبتي من نظام التفتفة للبذر.. إنسي....
10- ولما تخلصي أكل تحطي إيدك على بطنك.. -اللي عصافيرها بتصوصو من العينات اللي كلتيها-.. وتقولي له مش ممكن.. أنا عمري ما اتفجعت كدة..أنا قدامي أسبوع.. هابطل أكل فيه.....
وبعدين تمسكي الفوطة اللي دايمًا موجودة ع التربيزة من غير لازمة.. وتبوسيها.. آل يعني بتمسحي بؤك..وبعدين تستأذني منه لدخول التوليت لإصلاح ماكياجك.. وتخشي التواليت وتطلعي من شنطة إيديك.. لفة الفول والطعمية اللي جايباها معاكي..
وبالهنا والشفااااااااااااا

على فكره الكلام مش للبنات بس لالا للاولاد بس عشان دايما البنات بتكسف فى اى حته ولازم يعتبرو لان ايام الخطوبه معدوده وياريت تنفذى اللى قولته عشان تجوزى ومتفضليش قاعده عند بابى.....
يا خى البنات دى غريبه تيجى تكلمها تقولك انا حلوه ونغشه ومحدش قدى
وتيجى تسالها انت متجوزتيش ليه لحد دلوقتى تقولك انا قاعده فى بيت بابى
وهى تلقيها مطفشه 50عريس قبل كده
وياريت البنات ميزعلوش هو انا كدبت دى حقيقه

شكرررررررررررررررررررررررررررررررررا

هههههههههههههههههههههههه جامده يا بوس
وارجوا من الاخوات الانسات الاخذ بالنصيحه

ههههههههههههههههههههههههههههههه الكلام مش لينا لوحدنا يا احمد الكلام للطرفين بس انتوا تعزموا بس ياخي بلا عزومات بلا بتاع هبي اجيبوا ياكل في البيت وخلاص مش لازم نخرج ناكل بره ههههههههههههههه
بس واللهي موضوع جامد جدا بس احنا كبنات بنفهم في الاتيكت اوي ومرسي ليك موضوع جامد وارجوا الاخذ بالنصايح للطرفين علي الطرف الاول ان يقوم بالعزومه وعلي اطرف التاني والاولاني المحافظه علي الاتكيت

هههههههههههههههههههههه و الله يابني انتا زي العسل عالموضوع الجامد ده ........

انا و الله مش عارف امسك نفسي من الضحك

فعلا نصايحك جامدة كيك و يا رب كله يعرفها

جـــــــــــــــــــــــــــــــــامــــــــــــــــــــــد اوى والله يبنى
بس ياريت يتعلموا
ـــــــــــــــــــــــــــــــ
ادم

ههههههههههههههههههههه موضوع جميل اووووى
بس تاكد البنات كلها بتعمل كده والله الباقى والدور عليكوا

هههههههههههههههه
الموضوع جااااااااااامد جدا
علي فكرة الاتيكيت ده فن
ياريييييييييييييييييييت كل واحدة تتعلمه
علشان ماتحرجش اللي معاها والطفاسة تبان
ميبقاش غرامة فلوس وفضيحة كماااااااااااااااان
بليززززززززززز
الكلام ده مهم جدا

" طفاسة " ..... ؟ و " فضيحة " ........ ؟

لا لا اكيد الموضوع ده من قبل الهزار بس مش أكتر عشان بس البنات ما يزعلوش و لكن في بنات كتير جدا يفهموا في الاتيكيت على عكس ولاد كتير منهم ما يعرفش اصلا يعني ايه اتيكيت ........ هههههههههههههههه ..................... و شكـــــــــــــــــــــــــــــرا .............. د / ميدو " شمساوي "...

هههههههههههههههه
موضوع لذيذ فعلا بس احسن من النصايح دول نصيحه صغيرة مني ان الاتنين يبقو علي طبيعتهم لان الطبع بيغلب التطبع

جملة جامدة و الله ........ شكرا " بطوطة " ................ (" الطبع بيغلب التطبع ")

شكرا يا جماعه على الردود وبجد الموضوع من قبيل الهزار مش ان البنات كده بس على فكره فى منهم كده
وفى لا والله يكون فى عون الشباب اللى وقعين فى فخ عدم الاتيكيت